នាថ្ងៃទី១៤ ខែកុម្ភៈ ឆ្នាំ២០២២ ក្រសួងសេដ្ឋកិច្ច និងហិរញ្ញវត្ថុ ដែលជាសេនាធិការរបស់រាជរដ្ឋាភិបាល បានសម្ពោធដាក់ឲ្យប្រើប្រាស់ជាផ្លូវការនូវកញ្ចប់ថវិកាចំនួន ១០០ លានដុល្លារអាមេរិក សម្រាប់ជំរុញការអនុវត្តន៍ ក្របខណ្ឌយុទ្ធសាស្រ្ត និងកម្មវិធីស្តារ និងជំរុញកំណើនសេដ្ឋកិច្ចកម្ពុជា ក្នុងការរស់នៅជាមួយកូវីដ-១៩ តាមគន្លងប្រក្រតីភាពថ្មី ឆ្នាំ២០២១-២០២៣។ ទន្ទឹមនេះ កញ្ចប់ ថវិកានេះ ក៏បានផ្តល់ជូនធនាគារសហគ្រាសធុនតូច និងមធ្យម កម្ពុជា ចំនួន ៥០ លានដុល្លារអាមេរិក ដើម្បីជួយលើកស្ទួយវិស័យ សហគ្រាសធុនតូច និងមធ្យម ដែលជាវិស័យដ៏សំខាន់ក្នុងការចូលរួមគាំទ្រដល់កំណើនសេដ្ឋកិច្ចកម្ពុជា និងការបង្កើតការងារ ព្រមទាំងដើរតួនាទីយ៉ាងសំខាន់ ក្នុងការបង្កើនភាពធន់របស់សេដ្ឋកិច្ចជាតិទៅនឹងវិបត្តិផងដែរ។
លោក លឹម អូន អគ្គនាយក នៃធនាគារសហគ្រាសធុនតូច និងមធ្យម កម្ពុជា (ធនាគារ SME) បានលើកឡើងថា កន្លងមក ធនាគារ SME បាននឹងកំពុងដាក់ឲ្យអនុវត្តនូវគម្រោងសហហិរញ្ញប្បទានទ្រទ្រង់ សហគ្រាសធុនតូច និងមធ្យម ចំនួន ២លើក (SCFS I & II) មកហើយ ក្នុងនោះ៖ គម្រោង SCFS I ដែលមានទំហំថវិកា ១០០ លានដុល្លារអាមេរិក (ធនាគារ SME ៥០ លានដុល្លារអាមេរិក និងបដិ-ភាគពី PFIs ៥០ លានដុល្លារអាមេរិក) បានដាក់ឲ្យដំណើការនៅក្នុងខែមេសា ឆ្នាំ២០២០ និងបានបញ្ចប់នៅក្នុងខែតុលា ឆ្នាំ២០២០ ដែលបានផ្តល់ហិរញ្ញប្បទានជូនដល់ ៧៥៣ សហគ្រាស។ ជាងនេះទៀត គម្រោង SCFS II ដែលបាន នឹងកំពុងដំណើរការជាមួយកញ្ចប់ថវិកាចំនួន ១៤០ លានដុល្លារអាមេរិក (ធនាគារ SME ៧០ លានដុល្លារអាមេរិក និងបដិភាគពី PFIs ៧០ លានដុល្លារអាមេរិក) បានដាក់ឲ្យដំណើការចាប់ពីខែសីហា ឆ្នាំ២០២១ និងគិតត្រឹមថ្ងៃទី១៤ ខែកុម្ភៈ ឆ្នាំ២០២២ គម្រោងនេះបានផ្តល់ហិរញ្ញប្បទានជូនដល់ ១ ១០១ សហគ្រាស ជាមួយទំហំឥណទានសរុប ១៣៦ លានដុល្លារអាមេរិក។
លោកអគ្គនាយក បានបន្តទៀតថា ដោយមើលឃើញពីការទទួល បាននូវលទ្ធផលជាវិជ្ជមានចេញពីការអនុវត្ត SCFS II និងតម្រូវការចាំបាច់ក្នុងការបន្តគាំទ្រផ្នែកហិរញ្ញវត្ថុដល់សហគ្រាសធុនតូច និងមធ្យម ទើបរាជរដ្ឋាភិបាល តាមរយៈក្រសួងសេដ្ឋកិច្ច និងហិរញ្ញវត្ថុ បានសម្រេចផ្តល់ថវិកាបន្ថែមចំនួន ៥០ លានដុល្លារ អាមេរិក ដល់ ធនាគារ SME ដើម្បីបន្តអនុវត្ត SCFS II រួមនឹងថវិកាបដិភាគ ចំនួន ៥០ លានដុល្លាអាមេរិកទៀតរបស់ PFIs។ ដូច្នេះ ថវិកាសរុបនៃគម្រោងនេះនឹងកើនឡើងដល់ ២៤០ លាន ដុល្លារអាមេរិក (ធនាគារ SME ១២០ លានដុល្លារអាមេរិក និងបដិភាគ ពី PFIs ១២០ លានដុល្លារអាមេរិក)។
ហេតុដូចនេះ ម្ចាស់សហគ្រាសធុនតូច និងមធ្យម ដែលមានតម្រូវការហិរញ្ញប្បទាន អាចបន្តដាក់ពាក្យស្នើសុំឥណទានក្រោម SCFS II ដោយធ្វើការទំនាក់ទំនងផ្ទាល់ជាមួយ PFIs ណាមួយ ក្នុងចំណោម PFIs ទាំង ២៨ ឬ ទំនាក់ទំនងមកកាន់ ធនាគារ SME ដោយផ្ទាល់តាមអាសយដ្ឋានដូចខាងក្រោម៖
- អគារលេខ ៣០ ផ្លូវប៉ាស្ទ័រ កែងផ្លូវព្រៃនគរ សង្កាត់ផ្សារថ្មីទី១ ខណ្ឌដូនពេញ រាជធានីភ្នំពេញ ព្រះរាជាណាចក្រកម្ពុជា
- ទូរសព្ទលេខ៖ 096 811 1118
- អ៊ីម៉ែល៖ info@smebankcambodia.com.kh
- គេហទំព័រ៖ www.smebankcambodia.com.kh
- ឬអាចដាក់ពាក្យស្នើសុំតាមរយៈប្រព័ន្ធអនឡាញដោយគ្រាន់តែចុច៖https://forms.office.com/r/sABjYrVXe7
