នារសៀល ថ្ងៃទី០៥ ខែកក្កដា ឆ្នាំ២០២៣ ធនាគារ SME សហការជាមួយនឹង សមាគម ស្វាយចន្ទី កម្ពុជា បានរៀបចំសិក្ខាសាលាស្តីពី “លទ្ធភាពទទួលបានហិរញ្ញប្បទាន និង ការត្រៀមខ្លួនដើម្បីទទួលបានហិរញ្ញប្បទានពីធនាគារ SME” ក្នុងគោលបំណងចែករំលែកនូវចំណេះដឹង និងការរៀបចំផែនការអាជីវកម្មឱ្យបានរួចរាល់ ដើម្បីផ្តល់លទ្ធភាពឱ្យម្ចាស់សហគ្រាសធុនតូច និងមធ្យមទាំងអស់អាចទទួលបានហិរញ្ញប្បទានពីធនាគារ SME យកទៅពង្រីក វិនិយោគ ឬប្រើប្រាស់ជាទុនបង្វិលក្នុងអាជីវកម្មរបស់ខ្លួនជាដើម។

សិក្ខាសាលានេះ រៀបចំឡើងនៅអគារការិយាល័យកណ្តាល ធនាគារ SME ក្រោមអធិបតីភាពរបស់ លោកបណ្ឌិត លឹម អូន អគ្គនាយក នៃធនាគារ SME, លោក អួន ស៊ីឡុត ប្រធានសមាគម ស្វាយចន្ទី កម្ពុជា, និងមានការចូលរួមពី ប្រធានសហគម, ម្ចាស់សហគ្រាសដែលជាសមាជិក នៃសមាគម ស្វាយចន្ទីជាង ២០ រូប។