នាថ្ងៃទី២៧ ខែកុម្ភៈ ឆ្នាំ២០២៣ លោក នៀវ សុគន្ធ នាយកប្រតិបត្តិប្រតិបត្តិការ នៃធនាគារ SME បានចូលរួមជាវាគ្មិនកិត្តិយស នៅក្នុងសិក្ខាសាលាស្តីពី “ពង្រីកកាលានុវត្តភាពសហគ្រិនស្រ្តី ក្នុងបរិបទសេដ្ឋកិច្ច និងធុរកិច្ចឌីជីថល” ក្រោមការរៀបចំដោយក្រសួងកិច្ចការនារី និងមានអ្នកចូលរួមជាង១០០នាក់ មកពីស្ថាប័នក្រសួង និងមន្ទីរកិច្ចការនារីខេត្ត និងក្រសួងស្ថាប័នពាក់ព័ន្ធ ព្រមទាំងវិស័យឯកជន និងដៃគូអភិវឌ្ឍន៍។
សិក្ខាសាលានេះ ត្រូវបានរៀបចំឡើងដើម្បីជំរុញការយកចិត្តទុកដាក់របស់សហគ្រិនស្រ្តី ក្នុងការអភិវឌ្ឍអាជីវកម្ម ស្របតាមយុគសម័យឌីជីថល និងពិនិត្យលើយន្តការនានា របស់ស្ថាប័នពាក់ព័ន្ធ ក្នុងការគាំទ្រសហគ្រិនស្រ្តីឱ្យកាន់តែមានប្រសិទ្ធិភាព។
នៅក្នុងកិច្ចពិភាក្សា លោក នៀវ សុគន្ធ បានចូលរួមចែករំលែកពីលទ្ធភាព និងអត្ថប្រយោជន៍នៃគម្រោងហិរញ្ញប្បទានរបស់ធនាគារ SME ជាពិសេសគម្រោងហិរញ្ញប្បទានសហគ្រិនស្រ្តី ដែលគាំទ្រយ៉ាងពេញទំហឹងដល់សហគ្រិនជាស្រ្តី ជាមួយការផ្តល់ជូននូវលក្ខខណ្ឌអនុគ្រោះ ជាពិសេសអត្រាការប្រាក់ទាប។
