ធនាគារសហគ្រាសធុនតូច និងមធ្យម កម្ពុជា, វិទ្យាស្ថានស្រាវជ្រាវគោលនយោបាយ នៃក្រសួងហិរញ្ញវត្ថុ ប្រទេសជប៉ុន (PRI) ដោយសហការជាមួយអង្គភាពអាជីវកម្មខ្នាតតូច និងឯកជន, សាជីវកម្មហិរញ្ញវត្ថុជប៉ុន (JFC-Micro) បានសហការរៀបចំវគ្គបណ្តុះបណ្តាលស្តីអំពី «សហគ្រាសបង្កើតថ្មី» ដល់ថ្នាក់គ្រប់គ្រង នាយកសាខា បុគ្គលិក នៃធនាគារសហគ្រាសធុនតូច និងមធ្យម កម្ពុជា ប្រមាណ ៣៣នាក់។ វគ្គបណ្តុះបណ្តាលនេះ ត្រូវបានរៀបចំឡើងនាថ្ងៃទី១៤ ខែវិច្ឆិកា ឆ្នាំ២០២៣ ក្នុងគោលបំណងស្វែងយល់ពីគន្លឹះ និងយុទ្ធសាស្ត្រក្នុងការបង្កើតសហគ្រាសថ្មី ដើម្បីរួមចំណែកជំរុញការផ្តល់ហិរញ្ញប្បទានជូនដល់សហគ្រាសបង្កើតថ្មីប្រកបដោយប្រសិទ្ធភាព និងកាលានុវត្តភាពនៅប្រទេសកម្ពុជា។
លទ្ធផលប្រកបដោយផ្លែផ្កាពីវគ្គបណ្តុះបណ្តាលនេះ ជាសក្ខីភាពបង្ហាញពីចក្ខុវិស័យរួម ក្នុងការគាំទ្រដល់បរិយាកាសធុរកិច្ច និងការអនុវត្តនៃការចុះអនុស្សរណៈនៃកិច្ចសហប្រតិបត្តិការ រវាងក្រសួងសេដ្ឋកិច្ច និងហិរញ្ញវត្ថុនៃប្រទេសកម្ពុជា, ធនាគារសហគ្រាសធុនតូច និងមធ្យម កម្ពុជា, PRI និង JFC-Micro ដែលបានប្រព្រឹត្តទៅកាលពីថ្ងៃទី៧ ខែមិថុនា ឆ្នាំ២០២៣។
ថ្លែងក្នុងកិច្ចសម្ភាស លោក Hidetaka Tabata នាយកគ្រប់គ្រងនៃផ្នែកសហប្រតិបត្តិការអន្តរជាតិ របស់ PRI បានបញ្ជាក់ឲ្យដឹងថា៖ «ការគាំទ្រដល់សហគ្រាសបង្កើតថ្មី គឺជាតួនាទីដ៏សំខាន់មួយសម្រាប់ ស្ថាប័នហិរញ្ញវត្ថុរបស់រដ្ឋាភិបាល ហើយ JFC-Micro គឺជាស្ថាប័នហិរញ្ញវត្ថុឈានមុខគេ ដែលបានកំពុងដើរតួនាទីនេះ នៅក្នុងប្រទេសជប៉ុន។ យើងខ្ញុំសង្ឃឹមថា ចំណេះដឹងដែលទទួលបានតាមរយៈវគ្គបណ្តុះបណ្តាលនេះ នឹងត្រូវបានប្រើប្រាស់យ៉ាងមានប្រសិទ្ធិភាព ក្នុងការគាំទ្រដល់សហគ្រាសធុនតូច និងមធ្យម នៅកម្ពុជា»។
លោកបណ្ឌិត លឹម អូន អគ្គនាយកនៃធនាគារសហគ្រាសធុនតូច និងមធ្យម កម្ពុជា បានបញ្ជាក់ឲ្យដឹងដែរថា៖ «សហគ្រាសធុនតូច និងមធ្យម គឺជាកត្តាជំរុញដ៏សំខាន់សម្រាប់កំណើនសេដ្ឋកិច្ច ដែលជាហេតុធ្វើឲ្យរាជរដ្ឋាភិបាលកម្ពុជាផ្តួចផ្តើម និងបង្កើតធនាគារសហគ្រាសធុនតូច និងមធ្យម កម្ពុជា នេះឡើង ដើម្បីឆ្លើយតបតម្រូវការហិរញ្ញវត្ថុសម្រាប់សហគ្រាសគោលដៅ។ ដើម្បីសម្រេចបាននូវទិសដៅនេះ ធនាគារសហគ្រាសធុនតូច និងមធ្យម កម្ពុជា បានផ្តោតលើការអភិវឌ្ឍន៍ផលិតផលសេវាកម្ម បណ្តាញចែកចាយ ក៏ដូចជាការអភិវឌ្ឍធនធានមនុស្ស»។
លោកបន្តថា «យើងខ្ញុំពិតជាមានក្តីសោមនស្សរីករាយ និងសម្តែងការអរគុណចំពោះការគាំទ្រពី PRI និង JFC-Micro ក្នុងការចូលរួមការចែករំលែកបទពិសោធន៍ និងអភិវឌ្ឍចំណេះជំនាញ ដល់ថ្នាក់គ្រប់គ្រង និងបុគ្គលិកនៃធនាគារសហគ្រាសធុនតូច និងមធ្យម កម្ពុជា។ យើងខ្ញុំជឿជាក់ថា កិច្ចសហប្រតិបត្តិការនេះ នឹងពង្រឹងបន្ថែមទៀតនូវការគាំទ្រផ្នែកហិរញ្ញវត្ថុកាន់តែប្រសើរឡើងដល់សហគ្រាសធុនតូច និងមធ្យម នៅកម្ពុជា»។
គួរបញ្ជាក់ផងដែរថា កាលពីខែមិថុនា ឆ្នាំ២០២៣ កន្លងមកនេះ ធនាគារសហគ្រាសធុនតូច និង មធ្យម កម្ពុជា, PRI និង JFC-Micro បានរៀបចំវគ្គបណ្តុះបណ្តាលមួយស្តីអំពី «ការវិភាគ និងវាយតម្លៃឥណទាន»។ ជាក់ស្តែង វត្តមានរបស់ធនាគារសហគ្រាសធុនតូច និងមធ្យម កម្ពុជា រយៈពេលជាង៣ឆ្នាំកន្លងមកនេះ បាននិងកំពុងផ្តល់គម្រោងហិរញ្ញប្បទានប្រកបដោយលក្ខខណ្ឌអនុគ្រោះ គាំទ្រដល់ម្ចាស់សហគ្រាសធុនតូច និងមធ្យម ដោយផ្តោតលើវិស័យអាទិភាពរួមមាន ការកែច្នៃម្ហូបអាហារ, ការផលិតទំនិញប្រើប្រាស់ និងគ្រឿងបន្លាស់, ការស្រាវជ្រាវ និងអភិវឌ្ឍបច្ចេកវិទ្យាព័ត៌មាន, ការផលិតឧបករណ៍វេជ្ជសាស្ត្រ និងឱសថ និងវិស័យគាំទ្រផ្សេងៗទៀត៕
