នាថ្ងៃទី២៧ ខែមិថុនា ឆ្នាំ២០២៤ ធនាគារសហគ្រាសធុនតូច និងមធ្យម កម្ពុជា និងអគ្គនាយកដ្ឋានសហគ្រាសធុនតូចនិងមធ្យម និងសិប្បកម្ម នៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានចុះហត្ថលេខាលើអនុស្សរណៈនៃការយោគយល់ ក្នុងគោលដៅផ្តោតសំខាន់លើការបង្កើនលទ្ធភាពទទួលបានហិរញ្ញប្បទានសម្រាប់សហគ្រាសធុនតូច និងមធ្យម ក៏ដូចជាគាំទ្រវិស័យសហគ្រាសធុនតូច និងមធ្យម ដើម្បីជំរុញកំណើនសេដ្ឋកិច្ច និងការអភិវឌ្ឍ នៅកម្ពុជា។
ការចុះអនុស្សវណៈនេះ ត្រូវបានប្រារព្ធធ្វើឡើង នាក្នុងទិវាជាតិសហគ្រាសធុនមីក្រូ តូច និងមធ្យម លើកទី១ ក្រោមប្រធានបទ «ពង្រឹងប្រព័ន្ធអេកូឡូស៊ីសហគ្រាសធុនមីក្រូ តូច និងមធ្យម ដើម្បីកំណើនកាន់តែប្រសើរ» ដែលត្រូវបានអញ្ជើញជាអធិបតីភាពចូលរួម និងជាសាក្សី នៃការចុះអនុស្សវណៈនេះ ដោយឯកឧត្តម ហែម វណ្ណឌី រដ្ឋមន្រ្តីក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍, ឯកឧត្តម ផាន់ ផល្លា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាភិបាល នៃធនាគារសហគ្រាសធុនតូច និងមធ្យម កម្ពុជា, គណៈអធិបតី និងថ្នាក់ដឹកនាំជាច្រើនរូបទៀត។
តាមរយៈអនុស្សវណៈ នៃការយោគយល់គ្នានេះ គឺជាជំហានមួយឆ្ពោះទៅមុខដ៏សំខាន់ សម្រាប់សហគ្រាសធុនតូច និងមធ្យម ឱ្យចូលរួមក្នុងការអភិវឌ្ឍសេដ្ឋកិច្ច និងសង្គម ប្រកបដោយចីរភាព ភាពធន់ និងបរិយាប័ន្ន។ ភាគីទាំងពីរនឹងធ្វើការរួមគ្នា លើការលើកកម្ពស់ការយល់ដឹងអំពីនីតិវិធី នៃការទទួលបានហិរញ្ញប្បទាន និងអនុលោមភាពសម្រាប់សហគ្រាសធុនតូច និងមធ្យម នៅកម្ពុជា។
